extundelete tool - Undeleting files from ext3, ext4 partitions

Гарчигийг уншаад хоо гэж дуу алдав уу? Өмнө нь ext3, ext4 файл систем дээр файл нэгэнт устсан л бол дуусаа гэж боддог байлаа. Харин саяхан нэг линукс блогоос сэргээдэг тухай уншаад туршиж үзлээ. Хэд хэдэн файл устгаад буцаагаад сэргээхэд чадаж байна шүү.

Суулгахын хувьд тун амархан:

эндээс эх кодыг татаж аваад задлаад, хөрвүүлээд, суулгана.

sudo apt-get install e2fslibs e2fslibs-dev

tar -xjf extundelete-0.2.0.tar.bz2

cd extundelete-0.2.0

./configure

make

sudo make install

Устсан файл болон хавтасыг сэргээх:

Хатуу дискны /dev/sda3 тасалгааг /home гэж систем холбоотой байсан ба түүний /home/erkhemee/important_file файл устсан байсныг сэргээе гэвэл, 

extundelete /dev/sda3 --restore-file erkhemee/important/file

Хавтасыг бүхлээр нь сэргээх бол,

extundelete /dev/sda3 --restore-directory erkhemee/important

Бүх устсан файлыг сэргээх бол,

extundelete /dev/sda3 --restore-all

гэх мэт. Уг программын хөгжүүлэгчид устгсан файл яг баттай сэргэх эсэхэд баталгаа өгч чадахгүй гэсэн байсан. Гэхдээ л устаад удаагүй юм уу, дискны тухайн сектор хэсэгт шинэ өгөгдөл бичигдээгүй бол сэргэх магадлал өндөртэй байна байх.

Extundelete төслийн веб хуудас

Linux Poison blog
Ext4 undelete tools

цааш унших...

Synergy - Mouse, keyboard sharing on the multiple Desktops (Linux, Windows, Mac OS X)

Нэг зэрэг олон компьютер дээр ажиллах хэрэгцээ гарахад нэг их олон гар, хулгана өмнөө тавиад суух маш тухгүй юм.

Тэгвэл нээлттэй эх код бүхий Synergy программыг ашиглан нэг desktop компьютерээ үндсэн буюу сервер болгон сонгоод түүний гар, хулганыг локаль сүлжээгээр дамжуулан бусад компьютерийн гар хулганыг удирдах боломжтой болох юм. (Манай ажлын Тулгаа санал болгосоныг өнөөдөр тохируулан ашиглаж эхэллээ)

Өөрөөр хэлбэл олон дэлгэцтэй компьютер дээр ажиллаж байгаа мэт эдгээр системүүд дээрээ ажиллаад байна.

Тохиргооны хувьд маш хялбархан тул дэлгэрэнгүй бичсэнгүй. Хэрвээ үндсэн систем тань Үбүнтү Линукс бол энэ зааварыг уншаарай.

Холбоос:

http://synergy2.sourceforge.net

https://help.ubuntu.com/community/SynergyHowto

цааш унших...

Smart TV - Part 3: HTPC Projects review

Home Theater PC (HTPC) буюу Гэрийн Театр Компьютер гэдэг нь ерөнхийдөө HDTV зурагтад залган хөгжим, кино, фото зургийн сан үүсгэн хадгалж, эдгээр локаль эх үүсвэрээс тоглуулах, онлайнаар үзвэр үзэх, зарим ТВ чиглэлийг түлхүү дагнасан төслүүд нь DVR буюу бичлэг хийх, тв тюнер карт ашиглан олон сувгийн тоон тв үзэх хэрэглээнд зориулсан, зарим нь тодорхой нэг техник төхөөрөмжийн онцлогт тохируулагдсан (Xbox, ATV гэх мэт), программ хангамжийн нээлттэй төсөл болон бизнесийн бүтээгдэхүүн байдаг.

Гэртээ HDTV зурагтаа жинхэнэ утгаар нь ашиглаад ирэхээр DVD/VCD тоглуулагчийн үе үүгээр дуусч байна даа. Манайд ч HDTV харьцангуй хямдарч, өргөн сонголттой болсон байх.

Бизнесийн бүтээгдэхүүнд Windows Media Center, TiVo, Beyond TV гэх мэт 

Нээлттэй эх бүхий төслүүд нь MythTV, GeeXboX, LinuxMCE, SageTV, MediaPortal, XBMC, Boxee гэх мэт нилээд олон бий.

1. Windows Media Center

Ихэнхи хүмүүс энэ нэрийг харсан байх, гэхдээ тэр бүр ямар учиртайг нь мэддэггүй л болов уу. Windows Vista системээс эхлэн хэрэглэгчдэд үнэгүй дагалдуулан өгдөг болсон нь зах зээл дээр давуу байдал үүсгэх бодлого байх гэхдээ энэ нь бүтээгүй, хүмүүс хэрэглэдэггүй.

Мөн л HDTV руу Windows системтэй компьютерээ холбоод, локаль систем дээрх локаль кино, хөгжим гээд үзвэрүүдээ үзэх, онлайнаар үзвэр үзэх боломжтой. Мөн нэмэлт төхөөрөмж залгаад ТВ олон суваг үзэж ч болдог байх.

http://www.microsoft.com/windows/windows-media-center/

TiVo, Beyond TV, MythTV, GeeXboX, LinuxMCE, SageTV эдэрийг алгаслаа, зарим нь сайн хөгжөөгүй, заримыг нь монголд ашиглах боломжгүй.

2. XBMC

Xbox тоглоомын төхөөрөмжийг HTPC болгон ашиглахаар анх 2003 онд эхлэсэн нээлттэй эх код бүхий төсөл. Одоо windows, unix, linux, macos, ios гээд олон систем дээр ажиллах чаддаг болсон. Маш олон медиа файл формат, протокол дэмждэг ба энэ төслөөс хэд хэдэн төсөл салбарлан гарч амжилттай хөгжиж байгаа ба энд 9x9CloudTV, Boxee, Plex гээд олныг дурдаж болно. 9x9CloudTV нь peer-to-peer хэлбэрээр интернэт тв дамжуулах талаар, Boxee нь twitter/facebook гэх мэт social network талаар, Plex нь зөвхөн iDevices буюу Apple төхөөрөмж дээр ажилладагаараа онцлогтой. Эдгээр нь бизнесийн ажиллагаа явуулдаг ба үндсэн XBMC төсөлдөө санхүүгийн хандив, туслалцаа үзүүлж ивээн тэтгэдэг байна.

Зах зээлд хэд хэдэн ТВ нэвтрүүлэгчид болон цахим бараа үйлдвэрлэгчид өөрсдийн брэнд төхөөрөмж бүтээгдэхүүнийг XBMC суулган "Powered by XBMC" гэсэн лого, зөвшөөрөлтэйгээр худалдаанд гаргаж эхлээд байгаа гэнэ.

XBMC нь DRM хамгаалалт бүхий файл болон DVD диск зэргийг тоглуулж чадахгүй, мөн ТВ тюнер дэмдэггүй тул тв-гээс бичлэг хийдэггүй. Үндсэн код нь C++ хэл дээр, нэмэлт plugin хэсгийг python хэл дээр хөгжүүлэх боломжтой. Өөрийн гараар өөрт тохирох зүйлээ урлах дуртай бол энэ төсөл яг тохирно :)

 XBMC Aeon Skin:

http://xbmc.org/


3. MediaPortal

XBMC төслөөс 2004 онд салбарлаж гарсан ба Windows систем дээр DVR болон олон сувгийн тоон тв хүлээн авах хэрэглээнд зориулан C# хэл дээр бичигдсэн нээлттэй эх код бүхий төсөл. Тоон телевизийн DVB-S/S2/C/T дамжуулах стандарт, аналог тв, DVB Radio, DVB EPG (Электрон ТВ хөтөлбөр), телетекст гэх мэт тв стандартуудыг дэмждэг.

МедиаПорталыг тв тюнер картайгаар, тоон катв сувагтай хослуулан ашиглахад их тохиромжтой, тун дажгүй боловч ганцхан Windows систем дээр ажиллах боломжтой нь харамсалтай. (DirectShow, DirectX, .NET Framework ашиглаж хийсэн тул Линукс дээр ажиллуулахын тулд Intel VT дэмждэг процессор дээр KVM виртуаль орчинд юм уу Wine симулятор ашиглан суулгах боломжтой ч энгийн хэрэглэгчдийн хувьд энэ нь хэт түвэгтэй ажил)

http://www.team-mediaportal.com

4. Boxee

XBMC төслийн сайн талууд дээр social network нэмснээр Boxee төрсөн. Гэхдээ зарим эх код хаалттай байдаг, ялангуяа social network хэсэг. Boxee нь суулгахад хялбар, linux/windows/mac os гээд олон систем дээр ажиллах чадвартай, мөн уг boxee программыг суулгасан хэд хэдэн ухаалаг тв хайрцаг худалдаанд гарсан, D-Link Boxee box, Omega TV, Myka ION, NUU player.

Гэсэн хэдий ч Boxee-г HDMI/S-Video/VGA гаралттай зөөврийн болон ширээний компьютер ашиглаад HDTV болон аналог зурагт руу залган ашиглаж ч болно. 

Тэгэхээр таньд удирдлага хэрэгтэй. iPod/iPhone, Android утас байгаа бол гэрийнхээ wi-fi сүлжээг ашиглан Boxee/XBMC удирдах янзтай (удирдлагаа хайж зовохгүй).

Локаль хатуу диск дээрээ хэд л бол хэдэн кино, дуу хадгалж, хэдэн зуун нэмэлт программ, онлайн эх үүсвэрээс сонголт хийнэ. Торрентоос кино татна, гэрийнхээ сүлжээн дэхь бусад компьютерийн shared folder-оос кино үзэж болно, мөн FTP/HTTP/UPnP дээрээс эсвэл USB зөөврийн хард дискээс ч үзвэр үзэж, хуулж авч чадна.

Товчоор хэлэхэд хэрэглэгчдэд хамгийн их эрх чөлөө, тухтай хэрэглээг өгч байгаа ба хүсвэл интерфэйсийг монгол хэлээрээ орчуулж, нэмэлт программ бичиж ашиглаж ч болно. Гэхдээ XBMC/Boxee тв тюнер дэмждэггүй тул шууд ТВ суваг үзэх, бичлэг хийх зэрэг функц одоогоор байхгүй.
http://www.boxee.tv

За өнөөдөртөө ингээд өндөрлөе. Хэрвээ таньд сонирхолтой санагдсан бол өөрийн хэрэглэдэг Boxee хэрэглээний талаар дэлгэрэнгүй бичье.

цааш унших...

Smart TV - Part 3: GoogleTV review

2010 оны 5 сард танилцуулж саяхан худалдаанд гарсан GoogleTV (GTV) талаар өмнө товч дурдаж байсан. Гэхдээ хүлээж байснаас тааруу болсон байсан ба тиймээс нэгийг яг захиалах гэж байснаа цуцалж орхисон. Яагаад гэдгийг доор дурдах болно.

Гүүгл ТВ (ГТВ) нь Андройд Линукс үйлдлийн системтэй ба яг л ухаалаг утасын зах зээл дээр HTC, Samsung, Motorola гэсэн үйлдвэрлэгчид янз бүрийн брэнд нэртэй андройд утас гаргадагтай адил Sony, Logitech хоёр үйлдвэрлэгч GTV буюу андройд ухаалаг тв төхөөрөмжөө зах зээлд гаргасан.

Танилцуулга
ГТВ (GTV) уриа нь "TV meets Web".

Эндээс харахад барьж буй гол онцлог нь Вебийг зурагтийн дэлгэц дээр гаргах чиглэлийг түлхүү чиглэсэнг хялбар ойлгож болох ба онлайн контентийг веб дээрээс голчлон үзэх хайх, ТВ шууд сувгийг бичиж авах, Amazon Netflix гэх мэт онлайн түгээгчдээс үзвэр түрээслэх, Pandora Napster гэсэн онлайн хөгжмийн суваг сонсох, мөн цаашдаа 3дагч талаас нэмэлт программ хангамж (3rd party application addon) дэмжих боломжуудтай ба DISH network сансарын тв оператороос тв олон суваг хүлээн авч үзэж болно.

ГТВ ашиглахад хэрэгтэй зүйлс:

1. Зурагт буюу TVset (LCD, LED, Mirror ...)

2. Ethernet/WAP буюу гэрийн утастай/утасгүй сүлжээний төхөөрөмж

3. Cable or Satellite TV STB - КаТВ болон Сансрын ТВ хүлээн авагч хайрцаг (Манайд MNBC, Sansar Digital, SuperVision Digital гэсэн операторууд бий)

ТВ үзэнгээ түитерээр жиргэх, iPhone/Android утасаар зурагтаа удирдлах (гэрийнхээ wi-fi утасгүй сүлжээг ашиглана), фото зургийн цомгоо үүсгэх, touch pad бүхий тв удирдлагаа ашиглан ямар ч веб үзэх гээд дажгүй боломжуудтай ч дотроо том багтаамж бүхий storage байхгүй нь гамшиг юм.  4, 8Gb flash disk нь зөвхөн нэмэлт програм суулгахад зориулагдсан. 

Хатуухан хэлбэл жоохон гайгүй боломжуудаар өргөтгөгдсөн ATV л гэсэн үг.  Энэ нь хэрэглэгч өөрийн хувийн кино, хөгжмийн арвин сан үүсгэн хадгалах боломжгүй гэсэн үг бөгөөд зөвхөн онлайнаар үзвэр үзэх хэрэглээнд яг тохируулжээ. Тиймээс уриа нь "ТВ Вебтэй танилцлаа" шүү дээ. ТВ таныг, та бүхнийг таньдаг боллоо бол биш, хаха. Мөн GTV SDK одоо хүртэл гараагүй, хэзээ гарах нь тодорхойгүй. Тиймээс ГТВ дээр 3дагч талын хөгжүүлэгчид өөрсдийн нэмэлт программаар баяжуулах боломжгүй. Энэ бүгдээс харахад ГТВ одоогоор яг төгс ухаалаг ТВ хайрцаг болоогүй байна, миний хувьд.

1. Logitech Revue

Зурагтандаа залгаж ашиглах ухаалаг ГТВ хайрцаг. ТВ удирдлага нь утасгүй холболттой компьютерийн стандарт гар шиг байх бөгөөд trackpad нь хулганыг орлочихно. Энэ шийдэл нь надад лав таалагдаагүй, данхайгаад хэтэрхий овортой санагдсан.

Үнийн хувьд АНУд 299$ гэж байгаа ба дэлгэрэнгүйг дараах хаягаас үзээрэй.

http://www.logitech.com/en-us/smartTV/revue

2. Sony Internet TV or Sony Internet TV BluRay

Сони нь ГТВг 
"Sony Internet TV" гэж HDTV зурагттай нэгтгэн нэг төхөөрөмж болгон гаргасан ба дэлгэцнийхээ хэмжээнээс хамаарч үнэ нь 599$/24" эхлэж байна.

"Sony Internet TV BluRay" хувилбар нь HDTV зурагтгүй буюу ердийн ухаалаг ТВ хайрцагтай адил боловч BluRay диск уншигчтайгаар онцлог. Энэ нь мөн DVD/CD диск уншиж чадах юм байна. Үнэ нь АНУд 399$.

Эдгээрийн ТВ удирдага нь өмнөх Revue-тэй харьцуулахад овор арай багассан боловч бас л том хэвээрээ. Дээр үеийн бичгийн машиныг өөрийн эрхгүй санагдуулна, хэхэ.

Дотоод storage нь 9Gb flash нь мөн нэмэлт програм суулгахад ашиглагдах зориулалттай хэдий ч техникийн танилцуулга дээрээ USB mass storage дэмжинэ гэсэн харагдав. Сони харин харьцангуй чанартай хийгдсэн байж магадгүй юм. Дэлгэрэнгүй дараах албан ёсны сайтаас үзнэ биз ээ.

http://discover.sonystyle.com/internettv

Уул нь андройд платформ ухаалаг утасны хувьд их ирээдүйтэй байгаа ч ухаалаг ТВ хувьд арай болоогүй санагдана. Гэхдээ 3дагч талын хөгжүүлэгчдийн дэмжлэгийг аваад эхлэвэл яг л утас шиг хүчтэй болох нь гарцаагүй. ГТВ монголын нөхцөлд яг одоогоор төдий л тохиромжтой бус санагдав, цаашид хэрхэхийг нь ажиглаж л сууна.

цааш унших...

Smart TV - Part 2: AppleTV review

Smart TV бүтээгдэхүүнтэй танилцацгаая. Зах зээл дээр эхлэж гарснаар нь AppleTV (ATV)-ээс эхлэе.

Бусад iPod/iPhone/iPad зэрэг хит болж буй бусдынхаа хажууд тийм ч алдартай биш, зарим хүмүүс бол ийм бүтээгдэхүүн байдаг гэж мэдэх ч үгүй байх нь олонтаа. Ухаалаг ТВ хайрцаг (STB) гэхээсээ Online Media Player Terminal гэвэл илүү зохилно. Учир нь ATV2 буюу шинэ хувилбар нь өөртөө storage үгүй тул зөвхөн iTunes Store, Netflix онлайн түгээгчдээс төлбөр төлж үзвэр үзэх хэрэгцээг хангана. Гэхдээ эдгээр онлайн түгээгчид АНУ, Канадаас бусад улсаас хандаж буй хэрэглэгчдэд бараг үйлчилгээ үзүүлдэггүй тул монголоос ашиглах боломжгүй юм.

Харин өмнөх ATV хувилбарыг бол boxee, xbmc зэрэг программ суулгаад монголд ашиглаж болно. (Boxee, XBMC программуудыг дараагийн бичлэг дээр дэлгэрэнгүй танилцуулая)

ATV нь Wi-Fi ашиглан интернэтэд болон гэрийн утасгүй сүлжээнд холбогдох боломжтой, 720p буюу HD (High Definition) чанартай киног тоглуулах чадвартай ч Full HD буюу 1080p болон BlueRay чанартай киног тоглуулж чадахгүй, зурагт руу тоон HDMI болон аналог Composite (манайхан приставканы улаан, шар, цагаан залгуур гэж мэднэ дээ) кабелиар холбогдоно, Dolby Digital буюу 5.1 дуу дэмждэг.

ATV доторх эд ангийн задаргааг сонирхвол:

ATV2 дэлгэрэнгүй задаргааг сонирхох бол эндээс үзээрэй.

Эцэст нь ухаалаг ТВ хайрцаг гэхээсээ илүү онлайн үзвэр түрээслэн үзэх зориулалттай энэ терминалыг бидэнд зориулж гаргаагүй бүтээгдэхүүн тул ингээд орхиё, дэмий зүйлд цагийн гарз :) Харин үүний дараахан зах зээлд GoogleTV, Boxee box гарсны дараа Apple энэ дутагдалаа нөхөх дараачийн хувилбар бүтээх ажилдаа орсон шуум байгаа ба iTV гэгдэх магадлал өндөр байгаа гэнэ.

цааш унших...

Smart TV - Part 1: The Future of TV

Өмнөх IPTV болон GoogleTV бичлэгүүдээ амласан ёсоороо үргэлжлүүлж байна.

Smart буюу ухаалаг гэсэн үгс бас сүүлийн үед их мода болж байгаа биз? Хамгийн тод жишээ бол SmartPhone. Юугаараа ухаалаг утас болж байгааг надаар хэлүүлэлтгүй та бүхэн сайн мэдэх биз. Учир нь утас одоо халаасны компьютер бол ба техникийн хурдтай хөгжлийн явцад Мурын хуулийн дагуу компьютерийн эд ангиудын овор хэмжээ маш өчүүхэн жижиг буюу нанометрээр хэмжигдэх болж, тэр хэрээр хүчин чадал нь ихээр нэмэгдэж байгаа. Тэгэхээр өмнөх шигээ утасаар зөвхөн ярьж, текст мессеж бичих үндсэн хэрэглээнээс нь гадна 5m pixel camera ашиглан зураг авах, видео бичлэг хийх, FM сонсож, ТВ үзэх, дуу сонсох, видео үзэх, GPS ашиглан байршил тодорхойлж, Wi-Fi/3G сүлжээ ашиглан интернэтэд холбогдож, twitter/facebook гэх мэт social network ашиглан найз нөхөд бусадтайгаа онлайн харилцан гээд хэрэглээ тэлж байгаа болохоор "ухаалаг" гээд тодоруулаад байна л даа (энгийнээр хэлэхэд)

Тэгээд бас яг утас гэж хэлэхэд бас хэцүү, утастай зургийн апарат ч юм уу, утастай медиа тоглуулагч ч гэж болно л доо, хэхэ. Солонгосын нэг кино найруулагч зөвхөн iPhone4 камерийг ашиглаад бүрэн хэмжээний кино хийж байгаа гэхээр утас биш ч юм шиг, за за хадуурч байна, үндсэн яриандаа ороё.

ТВ тэгвэл бас "барьцаад" ухаалаг болж эхэллээ л гэж хэлэх байна. Өөрөөр хэлбэл ухаалаг утасны дээр дурдсан бүгд, дээр нь ТВ онцлог бүхий ухаалаг функц нэмээд ухаалаг ТВ-г төсөөлөөд үз дээ?

(энд TVset буюу таны зурагт, TV буюу телевиз (c1, tv5 ..), ухаалаг ТВ гэж internet-connected TV platform, HTPC (home theater PC) бүгдийг хэлж байгаа шүү)

Ухаалаг ТВ гэж юу вэ?

TVset+computer - Компьютер буюу set-top box ТВ-г ухаалаг болгоно.

Connectivity - Интернэт, интранэтэд холбогдоно.

Storage - Контент хадгалах хатуу дисктэй байна.

Applications - Хэрэглээний программын сан хөмрөг.

Social - Үзэгчдийн онлайн харилцааг үүсгэнэ.

Personal stuff - Хувийн буюу гэр бүлийн үзвэрийн сан

Parental control - Эцэг эхийн хяналт буюу хүүхдийн үзвэрийг хянах боломж

Watch later - Дараа үзэх буюу хүссэн үедээ үзвэр үзэх

Freedom - Жинхэнэ эрх чөлөө буюу та өөрөө ч ТВ суваг ажиллуулах боломж

гээд олон зүйлс давуу талтай. 

Уламжлалт буюу одоогийн бидний үзэж буй ТВ хэлбэр нь илт хоцрогдож эхлэсэн ба шинлэг болон нийгмийн соёлч давхаргийнхны шаардлагыг хангах нь улам бүр буурч байгаа:

Уламжлалт ТВ сул талууд

Мэдээллийн хараат байдал

Манай улс мэдээллийн хагас эрх чөлөөт буюу улс төрийнхний гарт хэвлэл мэдээлэл төвлөрдөг тул ТВ нэвтрүүлэг тэдний захиалгаар ихэнхидээ хийгддэг. Сонгуулийн үеэр энэ байдал бүр ихээр ажиглагдана.

Үзвэл одоо л үз

ТВ нэвтрүүлгийг яг гарч байх үед сахин сууж байж үзэх боломжтой тул дараа нөхөн үзэх боломжгүй

Дуу, дүрсний муу чанар

Манай ТВ сувгууд SD чанартайгаар цацдаг тул орчин үеийн тоон LCD том дэлгэц бүхий зурагт дээр үзэхэд тохиромжгүй.

Хэт их сурталчилгаа

Нэг цагийн кино үзэхийн тулд та бараг 2 цаг зарцуулах хэрэгтэй. Учир нь дунд нь 1 цаг гарангийн реклам үзэх хэрэг гарна. За сувгаа сольсонч гэсэн тухайн агшинд рекламгүй яваагүй өөр суваг бараг олдохгүй л болов уу.

За реклам яваагүй байсан ч дэлгэцний 3ны 1ийг бараг дүүргэх зурган, текст реклам зар доор нь гарч ирч анхаарал сарниулана.

ТВ салбарынхны хоцрогдол

ТВ хөтлөгч, сэтгүүлчийн боловсрол, ёс зүйгүй байдал хэрээс хэтэрсэн. ТВ хэт их арилжааны шинж чанартай болсон тул цаг нөхцөөс, зугаацах хэрэгцээнд илүү тохиромжтой болсноос биш үзэгчдэд боловсрол, мэдлэг олгох, танин мэдэхүйд нэмэр болох, гоо зүйн таашаал өгөх гэх мэт үүргээ умартсан гэмээр (Мэдээж бүгд биш, зарим нэг ТВ энэ үүргээ боломжийн биелүүлэлдэг, нэр дурдах шаардлаггүй болов уу)

Ухаалаг ТВ-ийн давуу талууд

TVset+computer - Компьютер буюу set-top box ТВ-г ухаалаг болгоно.

Энэ нь TVset буюу зурагт нь SRC, LCD, LED, Mirror TV гэх мэт дэлгэцийн олон төрлийн хэлбэртэй боловч дан ганц дэлгэцээс тогтох тул компьютер буюу STB (set-top box) нэмснээр ухаалаг болно. Зах зээл дээр AppleTV, GoogleTV, Boxee box гэх мэт олон STB болон үүнтэй адил бүтээгдэхүүн ширүүн өрсөлдөөнийг бий болгоно.

Connectivity - Интернэт, интранэтэд холбогдоно.

Интернэтэд холбогдсоноор наад зах нь бид ТВ дамжуулан skype ашиглан гэр бүл хоорондоо дүрст яриа хийх. Интернэт, торрентоос шинэ кино дуу үзвэр татаж авах, эргүүлээд бичлэгээ хуулах, ТВ хөтөлбөр татах авах гэх мэт давуу талтай. Өөрөөр хэлбэл ТВ одоо онлайн болсон. Youtube, Hulu, Vimeo гээд онлайн үзвэр олон бий. Мөн traffic cctv руу холбогдон замын түгжрэл харах, цаг агаар, валютийн ханш гээд хэлж барашгүй.

Storage - Кино дуу зураг гээд контент хадгалах хатуу дисктэй байна.

DVD, CD хогийн сав руу марш. Амархан зурагддаг энэ оптик дискнүүдийн үе дуусгавар болсон. Цахим хэлбэрээр нь үзвэрээ татаж авч хадгалаад хэзээ дуртай үедээ үзнэ. Хэдий чинээ том багтаамжтай хатуу дисктэй байна, төдий чинээ олон үзвэр хадгална. Хэдэн мянган кино, дуу цомог, фото зураг

Applications - Хэрэглээний программын сан хөмрөг.

ТВ сувгуудаар олигтой зүйл гарахгүй байна уу? КаТВ, IPTV сувгуудаа ухаад ч гэсэн үү? Тэгвэл ТВ программ сан руу орж дээ, ө.х. пицца захиалах, банкны дансаа шалгах, чатлах, түитр фэйсбүүкээ шалгах, имэйл бичих, ном сонин унших гээд янз бүрийн хэрэглээний хэдэн мянган программ байх болно. Яг л iPhone, Android application market шиг.

Social - Үзэгчдийн онлайн харилцааг үүсгэнэ.

ТВ одоо таныг "таньдаг" болсон, таны юу үзэж байгааг найзуудад чинь "ховлодог" болсон. Найзууд юу үзээд таалагдсан таалагдаагүйг та тэр дор нь мэдэж чадна. Түитер, фэйсбүүк таныг ТВ үзэж суухад чинь ч салахгүй нь дээ.

Personal stuff - Хувийн буюу гэр бүлийн үзвэрийн сан

Та кино болон дууны цомог цуглуулдаг бол ТВ дотроо хувийн цахим сангаа үүсгэж чадна. Дижитал камернийхаа фото зургуудаа ч хадгал, түүнийг чинь LCD зурагт таньд томоор сайхан үзүүлж чадна. Тэгээд хувийн фондоо зочиддоо ч сонирхуулж болно ш дээ. Таны зурагт одоо зургийн жааз, гэрийн кинотеатр, систем хөгжим л гэсэн үг.

Parental control - Эцэг эхийн хяналт буюу хүүхдийн үзвэрийг хянах боломж

Ухаалаг ТВ таны хүүхдийг элдэв аймшгийн, хэрцгий болон садар самуун зүйлс үзэх аюулаас ангижруулж чадна. Насанд хүрээгүй хүүхдийн сэтгэхгүйд эдгээр нь ноцтой хохирол учруулдаг тул гэртээ хүүхдээ тайван орхиж болно.

Watch later - Дараа үзэх буюу хүссэн үедээ үзвэр үзэх

Онлайн үзвэрээс та кино, тв шоу зэргийг хүссэн үедээ авч үзэж чадна. Мөн DVR (Digital Video Recorder) дэмждэг STB-той бол ТВ сувгуудаас хувьдаа бичлэг хийж авч чадна. Үүний тулд та заавал сувгаа солих шаардлага байхгүй, тв хөтөлбөрөөс бичлэг хийх цаг огноог сонгочиход ТВ үзэж суухад саад болохгүйгээр цаана бичлэг хийгдэнэ.

Freedom - Жинхэнэ эрх чөлөө буюу та өөрөө ч ТВ суваг ажиллуулах боломж

Одоо арилжааны хэдэн ТВ суваг, каТВ/IPTV цөөн суваг л үздэг цаг өнгөрсөн. Интернэтээс үзвэр үзэх боломж нь та өөрөө ч ТВ суваг ажиллуулах боломжийг олгоно. Яг л блог шиг, тиймээс видео блог ч хөтөлж болно шүү дээ. Google Adsense-ээр таны блог орлогождог байсан бол таны видео блог (хувь хүний тв суваг) чадахгүй гэж үү?

Товчоор хэлэхэд ухаалаг ТВ нь нийгэмд шинэ хэрэглээ, дадал, зах зээл, хэвшил уур амьсгалыг авчрах нь тодорхой. Аливаа зүйл сайн ч талтай, саар ч талтай байдгийн адил. Гэхдээ мэдээллийн хараат байдалд хүчтэй цохилт өгч чадах учир илүү их эерэг нөлөөлөл авчирна гэж таамаглаж байна.

ТВ үзэгчид одоо рекламтай хольсон mnb, tv5, tv9 ... гэсэн цөөхөн сонголттой цэс үзэхээ больж байна, интернэтийг тэр аяаар нь үздэг болж байна.

цааш унших...

GoGo зогсохгүй Adobe өөрөө хүртэл ...

Өмнөх бичлэгт Гөгө э-номын DRM хамгаалалт тун амархан крэкдүүлж байгаа тухай бичсэн. Тэгвэл Adobe дээрх өөрсдийнх нь sample books-с татаж аваад шалгаж үзвэл мөн адил үр дүн.

Ойрын үед ebook publishing business хол явахгүй бололтой (Adobe Digital Publishing Platform арай дээр өөр шийдэл, платформ гарч иртэл)

Энэ крэк хэрэгсэл гарч ирээд бараг бүтэн жил болж байхад Adobe одоо хүртэл нөхөөс хийгээгүй л байх юм.

цааш унших...

GoGo eBook DRM protection stripped

Монгол Контент ХХК-ийн book.gogo.mn гээд ном хэвлэлийн онлайн худалдаа, түрээсийн анхны сайт гарсаныг та бүхэн мэдэх байх. 

Тэгвэл эднийх Adobe Digital Edtions технологийн талаар ганц хоёр мэдээлэл уншиж суутал энэ нь нууцлал, хамгаалалт маш тааруу эд болох нь тодорхой болов. 2009 оны 3 сард нэгэн reverse engineering blog энэ хамгаалалтыг эвдэж чадсан нь одоо хүртэл засагдаагүй байгааг өнөөдөр туршилтын нэг ном түрээслэж аваад, түүний DRM хамгаалалтыг хакедаж үзээд мэдлээ.

Уг блогоос бэлэн python script татаж аваад нууцлалыг тайлахад ердөө 5 минут ч болсонгүй.

Adobe Digital Editions дээр харагдах байдал:

Хамгаалалтыг хуулсны дараа ердийн PDF reader дээр харагдах байдал:

Гөгө админ, хөгжүүлэгчид үүнийг анхааралдаа авна биз ээ. Араас script kiddies орчихож магадгүй гэсэн үүднээс нарийн ширийн зүйлсийг нь бичилгүй орхилоо.

цааш унших...

Amazon Kindle3 мэргэжилтэний нүдээр

Өмнөх бичлэг дээр Киндлийг хэрэглээ талаас танилцуулсан бол энэ бичлэгт техник, технологи талаас нь сонирхоё.

Техникийн үзүүлэлт:

Дэлгэц:

Epson EINK controller, 600×800 px, 167 ppi resolution, 15cm diagonal, 19.1 × 13.5 cm, 4-level grayscale, Electronic paper, LCD side scroller. 

Үйлдлийн систем:

Linux (2.6.10 kernel) буюу тусгайлан засварлагдсан 2.6.10 цөм.

Процессор:

ARM төрлийн Freescale i. MX353 CPU

Санах Ой:

64Mb RAM, 4Gb SD flash storage, хэрэглэгчид 3Gb зай.

Батарей:

3.7V, 1530mAh lithium polymer, BA1001 model. 

2 цаг цэнэглээд утасгүй холболтгүй ашиглахад нэг сар хүртэл хэрэглэнэ.

Холболт:

EVDO/CDMA AnyDATA DTP-600W 3G GSM wireless modem, 

USB 2.0 port (mini-B connector),  

Atheros AR6102G 802.11bg WiFi chip

3.5 mm stereo headphone jack, built-in speaker, 

AC power adapter jack. 

Медиа формат:

Kindle (.azw), Plain text (.txt), Unprotected Mobipocket (.mobi, .prc), MP3 (.mp3), Audible (.aa).

Хэмжээ:     19.1 × 13.5 × 1.8 сантиметр

Жин:     292 грамм

Баталгаа: 1 жилийн баталгаат үйлчилгээ, 30 хоногийн дотор буцаах боломжтой.

Free Kindle Reading Apps

Android, iPhone/iPad, Blackberry, Phone 7, PC, Mac платформд зориулсан Киндл уншигч программууд нь үнэгүй. 

http://www.amazon.com/gp/kindle/kcp

ТВ рекламыг нь сонирхвол:

Whispernet & whispersync help page:

Киндл төх-д ашиглаж буй амазон үүл технологитой холбоотой хэрэглэгчийн асуулт хариулт.

http://www.amazon.com/gp/help/customer/display.html?nodeId=200375890

Kindle Development Kit (KDK):

SDK нь Java хэл дээр тулгуурлагдсан бөгөөд одоогоор бета хувилбар тул нийтэд ил болоогүй байна. Уг китийг ашиглаад англи-монгол толь бичиг, киндлийн интерфэйсыг монголоор орчуулж хөрвүүлэх гэх мэт зүйлсийг хийх боломжтой болж магадгүй. Гэхдээ амазоныхон юу төлөвлөж буй нь одоогоор тийм ч тодорхой бус л байна.

https://kindlepublishing.amazon.com/kdk

Kindle3 Teardown:

Киндлийн дотоод бүтэц, зохион байгуулалтыг харах бол энд задлачихжээ.

http://www.zdnet.com/photos/amazon-kindle-graphite-3g-wi-fi-2010-teardown/461473?tag=content;get-photo-roto

Calibre - Kindle Management for Linux (unofficial)

Линукс хэрэглэгчдийн хувьд амазоноос албан ёсны хэрэгсэл гараагүй тул нээлттэй эх код бүхий Calibre программыг ашиглан ажиллах боломжтой ч яг албан ёсных биш болохоор алдаа мадаг гарахыг үгүйсгэхгүй. Тиймээс ч amazon.com дээрх вебхандалт бүхий "Manage your Kindle" хуудсыг ашиглаж ном, хэвлэлээ цэгцлэх нь найдвартай гэж зөвлөх байна.

Linux Source Codes for Amazon Kindle

Киндл нь тусгай Линукс (embedded Linux) төрлийн систем ба тиймээс ч уг техник дизайндаа зохицуулж амазоныхон өөрсдийн засвар өөрчлөлт хийсэн ба уг кодоо нээлттэйгээр байршуулжээ. Гэхдээ энэ нь зөвхөн Линукс системийн файлууд тул Kindle GUI, eReader app, Whispernet client гэх мэт амазоны өөрсдийн программуудын эх код нь байхгүй :P

http://www.amazon.com/gp/help/customer/display.html?nodeId=200203720

За товчхондоо нэг ийм дүр зураг харагдана. Технологийн хувьд сөхөөд буй нь гол зорилго нь дэлхий дээр хэдийнэ 1 сая гаруй борлогдоод цаашид ч улам газар авч буй бүтээгдэхүүнийг бүтээсэн технологийг сонирхуулах байлаа. 

Cloud systems, embedded linux device, linux development, web application, ebook formats, drm protection, cross platform application гээд манайхан уул нь нэг их хол хоцорчихоогүй л байна даа :)

Гадны зүйлийг тахин шүтэх гэхээсээ илүү манайд цахим хэвлэл нийтлэл,  түгээлтийн ийм зах зээл, үндэсний брэнд бий болгох талаар дутагдалтай байгааг онцломоор байна. book.gogo.mn хэдийгээр энэ чиглэлээр бизнес үйл ажиллагаа явуулж байгаа нь сайшаалтай ч зарим нэг талаар учир дутагдалтай байгаа тал харагдана. Энэнээс үүдээд үндэсний брэнд бүтээгдэхүүн бий болгох талаар  санаа төрснөө дахин нэг нийтлэл болгон дэлгэрүүлж бичье.

цааш унших...

Цахим хэлбэрээр ном, хэвлэл унших шинэ технологи: Amazon Kindle 3

Сүүлийн үед ихээр яригдах болсон Ногоон технологи буюу байгаль орчинд ээлтэй технологийн нэг болох цахим ном хэвлэл уншигчийн зах зээл бас ихээхэн тэлж, ширүүн өрсөлдөөний талбарын нэг болох төлөвтэй.

Sony, Amazon, Nook, Apple гэсэн гигантууд энэ зах зээл дээр бүтээгдэхүүнээ аль хэдийнэ гаргасан ч манайд одоогоор төдийлэн дэлгэрч амжаагүй байна. (Гэхдээ book.gogo.mn энэ чиглэлд анхлан гарч ирж байгаа ч одоогоор цахим номын фонд, сангаа үүсгэх ажилдаа түлхүү анхаарч буй санагдана)

Мэдээллийн Технологийн салбарын хүний хувьд шинэ технологийг гарсан даруйд хэрэглэж турших сонирхолтой хэдий ч тэр бүр бүгдийг нь худалдан авах боломж миний өөрийн хувьд бага байсаар байна. (Гэхдээ энэ өвөл ажил, гэр хоёр маш ойртсон тул машины граш, түлшинд зарцуулж буй зардлаа хэмнэсний үр дүн бага сага зүйл худалдан авах төсөвтэй болж Amazon Kindle 3 wi-fi ebook reader төхөөрөмжийг захиалж авав.)

- Amazon Kindle 3G + Wi-Fi нь 189$

- Amazon Kindle Wi-Fi нь 139$  

гэсэн үнэтэйгээр amazon.com дээр bestseller #1 бүтээгдэхүүн болж байгаа ба монголд 3G сүлжээ ашиглан интернэтэд орох нь ашиглаж буй траффикаас хамаарч харьцангуй үнэтэйд орох тул Wi-Fi хувилбарыг 139$ + (10$ santis cargo shipping cost) = 149$ өртөгтэйгээр 2 сар гаруйн дараа гар дээр ирэв. (Сантис карго хариуцлага алдсан тал бий)

3rd generation буюу Kindle3 ойролцоогоор 1 сая гаруй хувь борлогдсон гэсэн мэдээллээс харахад хэр ирээдүйтэй зах зээл болох нь ойлгомжтой :)

Бүтээгдэхүүний товч танилцуулга:

E-Ink буюу цахим бэх: гэгдэж буй технологи нь LCD дэлгэц дээр текстийг яг л номны хуудас мэт харуулдаг тул ердийн LCD дэлгэц шиг өмнөөс гэрэлтэж нүдийг чилээдэггүй давуу талтай. Иймээс та ebook reader дээр ном уншихдаа нэмэлт гэрэлтүүлэг хэрэглэх болно. Товчоор хэлэхэд цаасан хэвлэмэл ном уншиж буйгаас бараг ялгаа үгүй.

Amazon Kindle худалдан авснаар та amazon.com дээр хэрэглэгчийн эрх нээн, түүнийгээ Киндлтэйгээ холбох (register) ба ингэснээр дэлхийн хамгийн том онлайн худалдааны сайт болох amazon.com-оос дуртай ном, сонин, сэтгүүлийнхээ цахим хувилбар (soft copy/kindle edition)-г Киндл төхөөрөмж дээрээ (Wi-Fi or 3G) сүлжээ ашиглан татан авч унших боломжтой болно.

Өөрийн хуучин цахим хэвлэлээ ч унш:

Мөн та өөрт буй pdf, doc, txt гэх мэт форматтай цахим хэвлэлээ yourname@free.kindle.com, yourname@kindle.com гэсэн өөрийн имэйл хаяг руугаа attach хийн явуулахад таны Киндлд зориулан автоматаар хөрвүүлэн өгөх болно. Эхний мэйл нь үнэгүй хөрвүүлж өгдөг бол 2 дахь нь 10центийн төлбөртэйгээр хөрвүүлнэ. (Гэхдээ зарим pdf нь номны хуудсыг тэр чигээр нь зураг болгон оруулсан pdf форматтай байдаг ба энэ нь вектор текст руу хөрвүүлэгдэхгүй. Үүний тулд эхлээд OCR төрлийн хэрэгсэл ашиглан вектор текст бүхий pdf болгох хэрэгтэй.)

Халаасан дахь номын сан:

Киндл3 нь 3Gb байнгийн санах ойтой тул та бараг бүхэл бүтэн номын санг ч тэр чигээр нь багтаан авч явах боломжтой гэсэн үг юм. Мөн зарим Киндл хувилбар нь нэмэлт microSD санах ой дэмждэг нь ч байсан.

Wi-Fi / 3G сүлжээ ашиглан та ердийн веб хуудас үзэх боломжтой ба мөн Киндл рүүгээ mp3 файлаа хуулаад ном унших зуураа хөгжим сонсож болно. Гэхдээ чанга дуугарагч нь төдий л гоё сонсогддоггүй тул чихэвчээр сонсох нь илүү дээр.

Цаасан хэвлэлээс цахим хэвлэл рүү:

Amazon.com нь зохиолч, сонин сэтгүүл эрхлэгч, блог нийтлэлч нарт зориулан өөрсдийн бүтээлийн Kindle edition/soft copy хувилбарыг amazon.com дээр нийтлэх боломжийг олгож эхлэсэн ба мэдээж борлогдсон үнийн дүнгээс тодорхой хувийг шимтгэлд авна. Гэхдээ энэ нь манай монголын номын дэлгүүрийн хажууд хамаагүй бага санагдана. (Интерном гэхэд 20-c 30% шимтгэл авдаг байхаа?)

Гадаад хэвлэлийг гарсан дор нь уншина:

Мөн дэлхийн шилдэг сонин, сэтгүүл зэргийн Kindle edition буюу цахим хувилбарыг захиалан унших боломжтой. Жишээ нь өдөр тутмийн New York Times сонинг сарын 27.99$, USA today сонинг 23.4$ гэх мэт, тэгвэл 7 хоног тутмын Time сэтгүүлийг сарын 2.99$, Forbes 4.99/mo, Fortune 2.99/mo, PC Magazine 2.99$/mo гэх мэт үнээр захиалж болно.

Нэг худалдаж авсан бол хаана ч уншина:

Гэхдээ та заавал Amazon Kindle төхөөрөмж авалгүйгээр дээрх үйлчилгээг авах боломжтой. Android, Blackberry, iPhone, iPad, Phone 7 мобайль төхөөрөмж, Windows бүхий PC болон Apple Mac компьютерийн Amazon Kindle software суулгаад давхар ашиглаж болно. Жишээ нь Киндл уншигчаа гэртээ мартаад ирсэн байлаа гэхэд ажлынхаа PC дээрээ өнөөдрийн шинэ сонингоо гарчиглаж, уншиж буй номоо ч татаж авч болно. Өөрөөр хэлбэл amazon.com нь cloud technology ашигладаг тул таны киндл дээрх худалдан авсан ном, хэвлэлийн бүх хуулбар амазоны сервер дээр хадгалагддаг юм.


Амазон Киндлийг хэрэглэгчийн нүдээр харахад нэг иймэрхүү байна даа. :)


"Уншихаа боливол сэтгэхээ болино" гэдэг, монголчууд эргээд ном, хэвлэл уншиж эхлэж буй хэдий ч байгаль орчинд ээлтэйгээр цахим хэлбэрээр нийтлэх, түгээх, унших цаг их л ойрхон байна даа.

цааш унших...

Терминал дээр хогийн сав ашиглах жижиг зөвлөгөө

Анхлан суралцагчид хэрэгцээт файлаа санамсаргүй устгасныхаа дараа яаж сэргээх вэ гэж асууцгаадаг. ext3, ext4 файл систем дээр устгагдсан файл, хавтас сэргэхгүй!!!

Тиймээс энэ эрсдлийг багасгахын тулд энэ жижигхэн зөвлөгөө тус болж магад.

nano ~/.bashrc

гэх мэт дурын текст файл засварлагчаар энэ файлыг нээгээд доод хэсэгт дараах мөрийг нэм:

$alias trash="mv -t ~/.local/share/Trash/files --backup=t"

өөрөөр хэлбэл trash гэсэн шинэ комманд бий болгох ба энэ нь тухайн заагдсан файлуудыг шууд устгалгүйгээр хогийн сав руу зөөчихөж байгаа. Тиймээс санамсаргүй буруу файлаа устгасан бол буцааж сэргээхэд асуудалгүй. Файлаа бүр мөсөн устгах бол хогийн саваа нэг нягтлаж харчихаад хоослочиход л хангалттай.

Одоо бид шууд устгах файлаа бол rm file1 file2 гэх мэт хуучин аргаар устгах ба харин өдөр тутмын хэрэглээндээ trash file1 file2 гэх мэтээр шинэ дадалаа хэвшүүлэх хэрэгтэй.

Нэмэлт: Зарим хэрэглэгчид /bin/rm тушаалын нэрийг өөрчлөөд $alias rm="mv -t ~/.local/share/Trash/files --backup=t" гэж alias үүсгэсэн нь ч байдаг.

Дээр нь амьдрал ахуйдаа ч тэр хогийн сав хэрэглэж байгаарай. Намайг нэг удаа хогоо цаасанд боогоод халааслаад явж байсныг нэг танил маань яагаад шууд хаячихдаггүйг их л гайхаж байсан шүү, хогийн сав таарангуут хаях гэж аминдаа хичээж буй нь тэр юм. :) Манайхан дунд машины цонхоор ундааныхаа саваа, байрны цонхоор шилээ шидэх муухай хүмүүс их байдаг шүү!

цааш унших...

Web Developer Tools for Ubuntu

Веб хөгжүүлэгчдэд зориулсан дажгүй хэрэгсэл болох WDT суулган ашиглаж эхлэв. Суулгах зааврыг эндээс уншаарай.

цааш унших...

Та өөрөө Dropbox сервер хийж чадна

Сүүлийн үед Dropbox газар авч байх шиг байна. Мэдээгүй хүмүүст товч тайлбарлахад өөрийн файлаа нэтэд хадгалаад, хүссэн үедээ гар утас, компьютераасаа гэрээсээ, ажлаасаа хандаж ажиллах file share гэж ойлгож болно. Нэг үгээр хэлбэл онлайн файл банк :D

Гэхдээ Dropbox үнэгүй 2Gb зай олгоод нэмэлт талбар хэрэгтэй бол худалдаж авдаг тул манайхан хэрэглэхэд бас хэцүү.

Тэгвэл та нээлттэй эх (linux, openssh-server, rsync, inotify, lsyncd) ашиглаад үүнтэй адил онлайн үйлчилгээг өөрөө ч хийж чадна. Эндээс уншаарай, орчуулах гэснээ түвэгшээв :D Dropbox шиг болгоё гэвэл багахан GUI программ, хэрэглэгч төлбөрийн веб систем хийж холбох болно. Амжилт!

цааш унших...