Tuesday, November 07, 2006

Линукс сисадминууд анхны хүндрэлүүдийг хэрхэн давдаг вэ?

Сүүлийн үед Linux эхлэн суралцаж байгаа найзууд, танилууд маань анх тохиолддог бэрхшээлд хэтэрхий автагдаад, бие даан шийдвэрлэж чадахгүйд хүрэхээрээ Линукс хэцүү, бэрх гэх мэтчилэн шантраад байгаа нь ажиглагдлаа. Мөн зарим хүмүүсийн хүсэлтийн дагуу элдэв програм суулгах, тохируулах заавар зэргийг энд тэр бүр бичээд байх нь боломжгүй тул

Линукс эхлэн суралцаж буй СисАдминуудад анхлан тохиолдох хүндрэлүүдийг давахад нь жоохон ч гэсэн туслах зорилгоор товч бичихээр шийдлээ.


Би үүнийг яаж давдаг байсан бэ
Би гэж хүн анх Линукс системийг 2001-2002 онд л байхдаа RedHat Linux 7.0 хувилбарыг хамгийн анх суулгаж байсан санагдана. Тэр үед Anaconda (RedHat Linux Installer) одоогийнх шиг ийм тухтай байсангүй зарим зүйлсийг гараараа хийдэг байлаа. Жишээ л гэхэд автомат-аар partition хуваахгүй, Windows гэх мэт бусад систем суусныг автоматаар таньж Lilo,Grub гээд систем эхлүүлэгч нарт оруулдаггүй гэх мэт.
За тэгээд анх хэвийн ажиллагаатайгаар суулгаж сурталаа нилээд олон удаа оролддог байсан. Миний хувьд шинээр танилцаж буй Линукс систем маань үнэхээр их сонирхол татаж, хүчин чадлыг нь биширч байсан тул хэзээ ч хүнд хэцүү байна хэмээн орхиж байсангүй. Заримдаа шийдэж чадахгүй зүйлс тохиолддог ч үүнийг дараах аргуудаар шийдвэрлэхийг оролддог:

1. Өөрийн системээ алдаагүй эсэхийг нягтлах, алдаагүй зөв хийсэн эсэхээ шалгах
2. Google-ээс хайх
3. Тухайн програм, технологийн албан ёсны вебсайтаас холбогдолтой мэдээлэл, гарц хайх
4. Илүү туршлагатай нэгнээс зөвлөгөө авах
5. Тухайн програм, технологийн талаар илүү дэлгэрэнгүй, нарийн мэдлэг олж авах, унших
6. Үүнийг орлуулж болох бололцоо байгаа эсэхийг хайх, олж авах

1. Өөрийн системээ алдаагүй эсэхийг нягтлах, алдаагүй зөв хийсэн эсэхээ шалгах
Системд маань маш олон төрлийн програм суусан байх тул эдгээр нь алдаагүй цэвэр суусан ажиллаж байгаа эсэхээ олж тогтоох нь чухал юм. Үүндээ бат итгэсний дараа та тухайн ажиллагааг алдаагүй үнэн зөв хийсэн эсэхээ нягтлах хэрэгтэй. Үүний тулд тухайн програмыг хэрхэн суулгах талаархи албан ёсных нь гарын авлага материалыг нь уншиж, нарийн танилцах хэрэгтэй болно.

2. Google-ээс хайх
Дараагийн шатанд та зөв суулгасан ба таны систем алдаагүй байсан бол энэ нь тухайн програмын өөрийн нь алдаа болон бусад төрлийн ямар нэгэн асуудал байж болно. Алдааны мессеж болон алдааны log бүртгэл зэргээс нь сэжүүр олж аваад түүгээр түлхүүр үг хийн интернэт хайлтын системүүдээс хайхад ихэнхи ийм асуудлыг шийдвэрлэчихдэг туршлага бий шүү. Нээлттэй Эхийн Програмуудыг маш түгээмэл ашигладаг тул эдгээрийн талаарх мэдээлэл ч нээлттэйгээр түгээмэл байдаг.

3. Тухайн програм, технологийн албан ёсны вебсайтаас холбогдолтой мэдээлэл, гарц хайх
За дараагийн шатанд энэ нь зөвхөн таньд л тохиолдсон эсвэл маш ховор тохиолдол бол та албан ёсны вебсайтаас нь энэ талаар ямар нэгэн зүйл бичигдэж байсан эсэхийг нягтлах хэрэгтэй. Эсвэл тухайн програмыг түгээгч баг, холбогдох хаяг руу имэйл бичин харилцах нь дээр боловуу.

4. Илүү туршлагатай нэгнээс зөвлөгөө авах
Уг програмыг удаан хэрэглэсэн мөн илүү туршлага бүхий нэгнээс энэ талаар асууж лавла. Имэйл лист, имэйл груп, веб форумууд гээд Линукс хэрэглэгчид дэлхий даяар байгаа ба таньд дуртайя хэлж өгөх болно.

5. Тухайн програм, технологийн талаар илүү дэлгэрэнгүй, нарийн мэдлэг олж авах, унших
Мөн ихэнхи алдаа болон програм ажиллахгүй байгаа зэрэг нь тухайн програм болон технологийн талаар мэдлэг нимгэн болон шаардлагатай нарийн зүйлсийг ойлгоогүйгээс бас ихэвчлэн гардаг. O'Reilly энэ талаар бараг гаргаагүй ном байхгүй байх. Боломжтой бол номыг нь hard copy эсвэл soft copy -гоор нь олж авч уншвал нилээд зүйлсийг мэдэж авна.

6. Үүнийг орлуулж болох бололцоо байгаа эсэхийг хайх, олж авах
За хамгийн сүүлд тухайн програмыг дээрхи бүх аргаар оролдоод суулгаж дийлэхгүй бол зүгээр л орхичих. Болохгүй бол заавал амжуулах гэж зүтгэж өөрийгөө зовоосноос үүнтэй адилхан ажиллагаатай мөртлөө өөр програм ч зөндөө бий шүү дээ. Бид чинь Нээлтэй Эх бүхий Програм Хангамжийн ертөнцөд амьдарч байна. Өөр нэгийг хайн олж аваад л дахиад эхнээс нь үзнэ дээ. Харин дараа нь та үүнийг орлуулсны дараа өөр тест систем дээр ч юмуу тухтайхан шиг дахиад туршаад үзэж болно шүү дээ.

Мөн та анхлан линукс системийг суралцаж байгаа бол Линукс системболон Нээлттэй Эхийн Програм Хангамжийн талаар эхлээд сайн уншиж, суралцах шаардлагатай юм. Үлгэрлэвэл боксын бээлий гэж юу болох дэвжээ болон тулааны техник зэргийг сайн мэдээгүй байж боксын тулаанд орохтой агаар нэгэн. Иймээс эхлээд шаардлагатай мэдлэг, чадварыг олж ав, харин бусад нарийн мэдлэг, туршлагыг явцын дунд олж авах хэрэгтэй. Үүний тулд өдөр бүр шинийг уншиж, мэдэж, туршиж байгтун. Өдөр бүрийн энэ хөдөлмөр, хичээл таныг нэг л өдөр илүү түвшинд аваачсаныг мэдрэх болно.

Таны амжилт бүтээл арвиг байг!


цааш унших...

Monday, November 06, 2006

iPodLinux - Hacking iPod


Сүүлийн үед embedded system тэр дундаа embedded linux миний сонирхолыг ихээр татах болсон л доо. Солонгост сурдаг найз Тэгшбаяр маань энэ чиглэлээр нилээд туршлагажиж байгаа ба намайг бас "уруу татсан" нь энэ. ;) Бид хоёр хааяа мөрөөддөг л дөө. Жижигхэн хөөрхөн ч нилээд супер маягийн халаасны Монгол-Гадаад хэлний тольбичиг, ярианы дэвтэр бүхий электрон төхөөрөмж хийх талаар.. Дээр нь нэмээд медиа тоглуулагч, зургын цомог, фм радио хүлээн авагч энэ тэртэй гээд л... За тэгээд хийх юм, хэрэгцээ зөндөө зөндөө...

Тэгээд яг хийх гэхээр өнөөх л ядуу буурай орны зовлонд унана даа. Наад зах нь л Development Board, Flash ROM, Tester энэ тэрээс өгсүүлээд л тоног төхөөрөмж байхгүй. Бүгдийг гаднаас авна гэвэл нилээд хөөрхөн төсөв гарчих жишээтэй. Байхгүйнээ :(

Гэхдээ хүний сонирхол татагдаад, тэмүүлээд ирвэл ямар нэгэн байдлаар хийж үзэж байж л санаа амарна. (Дээр үед "шилэн форд" чаачаантай адил машинийг нэг монгол дархан дан модоор хийчихсэн гэсэн яриа ч байдаг шүү)

"Чанга гар" (hackers/crackers)-ууд маань аль хэдийнэ л нөгөө үйлдвэрлэгдэж гарсан хэдэн төхөөрөмж, бүтээгдэхүүнийг өөрийн хүссэнээр өөрчилөх, нэмэх, сайжруулах зүйлийг гаргачихдаг хойно, Apple iPod mp3 тоглуулагч төхөөрөмж дээр µCLinux port-лж орхижээ.

Хэрвээ таньд хуучин ч юмуу iPod байдаг ба linux систем ашиглах дуртай, тэгээд дээр нь өөрийн гэсэн mp3 тоглуулагч хиймээр байвал iPodLinux татаж аваад хакдаад үз.

Ер нь инженер сэтгэлгээтэй хүмүүс аль хүүхэд байхаасаа л тоглоомоо задлаад үзчихдэг, яаж ажилладгыг ухдаг сониуч зантай байдаг. Энэ бол тийм л зангийн хэлтэрхий гэмээр юмуу даа. За ингээд би ч бас нэг хуучин iPod-ыг customized own mp3/media player, game box болголоо.

Happy Hacking iPod!


цааш унших...

blogger templates | Make Money Online